مشاهدة النسخة كاملة : عقد لولو / يتقلد أسى ..!! ( قصة من أجزاء ) ........ شيخة الشيخات
( 1 )
.
.
فتحت عيونها بتعب ..
حاولت ترفع راسها .. ماقدرت
حست انها فقدت راسها
قالت في نفسها /
ياترى كم الساعة ..؟
الحين صباح لو مسا ..؟
مدري وش فيّه .. موب قادرة حتى
أحرك ايديه أييب الموبايل اشوف كم الساعة ..!!
دفنت راسها في مخدتها من يديد
وحاولت تسترخي
وتتنفس بهدوء
بدت اتردد أذكار الصباح .. مع انها ما تأكدت
من وقتها وفي أي ساعة هي ..!!
غالبت تعبها وقامت بكسل .. مع بعض
الآلام في جسمها
ساعة الهاتف تقول انها 6 الفجر ..!!
يااااالله الحمدلله بعدنا الفجر
مافاتتني الصلاة ..!
أسرعت للوضوء
في مرايتها وقفت عند غسل ويهّا
شد انتباهها حمرة في عيونها
وبعض التورم تحتهن ..!
تذكرت انها نامت وهي صايحة ..!
كملت وضوءها ..
وسرحت شوي
طرى على بالها .. ذاك الوجع ومر الأسى
رشت ويهّا بالماي ..!
كأنها تريد مسح ألم تذكرته .
قبل لا تبدأ في الصلاة لاحظت جفاف ذراعها
أوووووووه
كالعادة .. كل مافكرت فيه
نسيت حتى تواتر الوضوء ..!!
ياربي ارحمني برحمتك .
ردت من يديد تعيد وضوء الفجر
اللي قرب يرحل وهي
فكرها راحل قبله ..
فرشت سيادتها .. وكبرت للصلاة .
المودني عبدالسلام
16-03-2006, 06:14 PM
سيدتي الفاضلة
دوما بالجوار
ننتظر المزيد
مودتي
عبدالسلام المودني
إيمان السعيد
17-03-2006, 02:05 AM
رائعه جميلة بعمق سيدتى
لكى مودتى واحترامى
نــــــــغ ـــــــــم
.
.
أنهت صلاتها .. ورفعت كفوفها
تطلب من الله .. وتشتكي خوفها ..!!
يارب .. وانت عالم بحالي .. مثلما
أسكنته فوادي على غير ميعاد ..!
اللهم .. عطني الجلد على بعده .. وحرماني منه
ومثلما .. ملكته نبضي ومشاعري ..
غصب عني .. اجبر عزاي .. ان ماكان لي به / نصيب .
طوت سيادتها مع شيلة الصلاة .. وقامت تستعد
للخروج لعملها ..
ما قدرت تتخلص من هذا الأسى الجاثم على أنفاسها
ولا تقاوم مرارة العبرة اللي كل شوي / تخنقها
دادا وينج ... ؟ <<<<<< ( مربية رافقتها عمر )
صباح الخير يابنتي .. ازيك النهارده ..؟
مالك كفى الله الشر .. ليه وشك مخطوف كده ..؟!!
قامت وحبتها على راسها ..
صباح الخير دادا
وش اصبحتي فديتج ..؟
أنا كويسة .. بس انتي مش عجباني ..
مالك .. إيه تعبك ياعنيه ..؟
تنهدت وعضت على شفتها
تقاوم رجفة اعتلتها .. مهددة بالصياح
وبلعت ريقها بصعوبة .. ومعاه عبرة / مرة
مافيه شي يادادا
بس تعبانة شويه .. لاتشغلين بالج
اشغل بالي .. ؟
واشغله في مين ان ماكنتش اشغله بيكي
دى انتي حبيبتي وبنتي ودنيتي كلها
أدري فديتج .. حبيبتي انتي يادادا
بس مابا أثقل عليج واتعبج اويايه
المهم فديتج جهزي لي الشاي
عشان اطلع تأخرت .
مش حاتفطري ..؟
مالي نفس يادادا
يالله يالله اشرب الشاي
طلعت عنها حزينة لحالها
تردد بعض الأدعية ان يحفظها الله
ويطمن قلبها .
مشطت شعرها .. وسرحت .. لين حامت روحها
صوبه .. مسافرة لدياره .
تذكرت حبه لشعرها الطويل .. وكيف كان يتمنى
لو ليلة يتلحف به ..!
ابتسمت .. وخرت دمعة مريرة على خدها
وسقطت على خصلات شعرها ..!!
تنهدت وقالت في نفسها ..
هذا الشعر اللي ماسقاه غير دهن العود
خسااااارة .. من عذابك .. صارت حتى دموعي
تغمره .. تسقيه .!!
لبست عباتها .. وطلعت للصالة
تشرب كاسة الشاي على عجل .
سـعد عبـدالله
19-03-2006, 01:06 PM
<
مـتـــابــ ع
<
كونــي بخير شيخــة
/
.
نزلت .. و هي شاردة الذهن
عقب ما حبت راس ابوها وامها وكفوفهم .
ركبت السيارة ..
كانت الإذاعة تبث أخبار وجع العراق ونزفه ..!!
محيي لو سمحت غير المحطة ..
في نفسها ... ( موب مزدادة روحي ألم ولا جروحي نزف) ..!!
انبعث صوت القيثارة الفيروزي النغمات
كنا نبعت له مكتوب يبعت مكتوبين
شو قالوا لك يا محبوب مغيّر من شهرين ..!!
تنهدت بحرقة تقاوم عبراتها المزمنة
في طريقها مرت بشارع زايد الثاني
ويت عينها على قصر الحصن ..
ااااه ياويلي يابويه .. الله يرحمك يا الحنان
هذا بيتك ومرباك صغير
كل ما شفناه زادنا ويع ولوعة لفرقاك .
مسحت دمعة تحدرت تحت غشوتها
ما رامت لها حيلة
عشان تمنعها من النزول .
وصلت مكتبها ..
صباح الخير روضة
هلا يسعد صباحج فديتج
وش أصبحتم اليوم ..
وش آخر أخبارنا .. والوزارة اليديدة ..؟!!
سلامتج طال عمرج لا جديد
ترى نحن في عملنا واللي ياي حياه الله
صدقتي والله يا روضة
ربي يوفقهم بس .. للي فيه خير البلاد والعباد
هاه شو جدولنا اليوم ..؟!!
يطول لي فعمرج .. المجمع الثقافي اتصلوا
بخصوص معرض صور ابويه زايد والترتيب له
ياااالله يا روضة لا تزيديني والله اني توني
مريت من جدّام قصر الحصن ولا تمالكت نفسي
ياويل قلبي لي متى هالحزن كل ماانذكر اسمه او شفناله صورة ..!!
ربي يرحمنا برحمته فديتج وش نسوي ..!
المهم .. اتصل بي بعد الشاعر الكبير ( ......... )
يسأل عن موضوع الأمسية اللي دعيناه لها
من ضمن فعاليات المعرض ..
انزين فديتج اتصلي به وحوليه عليه
وأنا بارتب اوياه موضوع قدومه و مكان الإقامة
ما نبا نتفشل مع شخصيات لها ثقلها في الساحة
الأدبية والإعلامية .
حاضر فديتج .. تامريني شي ثاني ..؟
سلامة روحج يا روضة .. وسامحيني أثقل عليج
لكن والله اني مدري لولاج وش سويت ..!!
فديتج عيوني لج .. بس المهم أشوف ابتسامتج
الحلوة ترجع من يديد .
تنهدت بحزن وهزت راسها
مثل اللي يقول ان شالله .
.
جرس الخط الداخلي للمكتب ..
الو .. هلا روضة .. لبيج عيوني .
غناتي فيه وحدة تبا تقابلج
على انفراد .
ما قالت هي من .. ؟
لا .. سألتها قالت .. صديقة قديمة .!!
انزين لا خليت منج خليها تقرب ..
وخلي سيد اييب لنا كابتشينو .. ترى أنا للحين بعدج ما ضيفتيني ..!!
تضحك مشاكسة لروضة ..
بس جذية .. ؟ فااااالج طيب الحين احلى كابتشينو .. لأغلى عيون .
دخلت الضيفة .. ووقفت تلقي السلام ..
عرفتيني ..؟!
لاوالله .. الصوت موب غريب عليه .. بس شلي الغشوة عشان أشوفج
كيف باعرفج وأنا ماشفتج بعدني .. !!
هاه عرفتيني الحين ..!!
أووووه / فددددديتج .. موزة ..!! ..
تحضنها بود ووله قديم .. وبحرارة لقاء تأخر سنين .
الموز .. من متى ماشفتج .. وين دارج .. وليش ماتنشدين عني
نسيتي أيام الجامعة .. والسكن الداخلي ..؟؟!!
نسيتي العين .. وطلعتنا كل أسبوع من بوظبي للجامعة
وسوالفنا و أحلامنا اللي كنا نرسمها ارباعة ..؟!!
لا والله فديتج ما نسيت لكن الدنيا .. تاخذ المودمي من عمره ..
هاه .. طمنيني عليج .. وش أخبارج وش مسويه مع الأيام
بعدج حساسة مثل ما أحيدج .. ودمعتج قريبة ..؟!!
هيه والله يا موزة .. الا أكثر بعد .. كنا نظن لي كبرنا بنقسى
وبيشتد عودنا .. وتقوى قلوبنا ..!!
الظاهر ياغناتي .. كل ما كبرنا من كثر الجراح ضعفنا زيادة
ولا عاد للقلوب قوة على جمع الألم وتضميد النواح ..!!
انتي خبريني وش أخبارج وين صرتي ..
فديتج أنا توضفت في المجمع الثقافي .. ومستقرة هناك
والعمل مريح .. ونتعامل مع طبقة مثقفة .. ونستضيف ناس
تدرين على مستوى فكري معين ..
انتي بعدج تكتبين مثل يوم كنا بالجامعة ..؟
هيه نعم بعدني أكتب بس على خفيف .. لزحمة العمل
وكثر المسؤوليات ..
وهذه الأيام نحن نرتب لمعرض عندكم لصور الغلا ابويه زايد
ومستضيفين عدة كتاب وشعراء على شرف المعرض ..
انزين عشان جذيه أنا يايه أنسق اوياكم بهالخصوص
وكم استانست يوم دريت انج انتي اللي ماسكة الموضوع .
حياج الله ملايين والله ياموزة .. الساعة المباركة فديتج
وفديت هالمعرض اللي خلاني أشوفج .. وأتطمن عليج ..
تفضلي فديتج .. اشربي هالكابتشينو الفنان .. ترى مابتلقين
حد يسويه مثلنا .. على قولة أخوانا المصريين .. ولا أجدعها كافيه
يسويه بهالزين .. تفضلي غناتي بالعافية .
سرحت ثواني .. لحظة داعبت أنفاسها رائحة القهوة
تذكرت يوم قالت له ..
لحظة ما تتقهوى فنيالك الصباحي .. أنا أشم أنفاسك
بصدري .. وعلى البعد أحسك بشراييني مع الأنفاس تجري .
ابتسمت بحزن .. وانتبهت ان موزة كانت تكلمها .. !!!
جليلة ماجد
23-03-2006, 06:43 PM
يااااه يا شيخة ..
تجيدين العزف على الوتر ...
الله يرحم أيّام العين و المساقات:)
أتابع معك أنـا
دمتِ بألق!!
محمود عبد اللطيف
23-03-2006, 06:58 PM
سلمت يداك
لا استطيع نقد القص
.
انتبهت لصوت موزة يناديها
هاه فديتج .. شوكنتي تقولين ..؟
وييييييه يا طفلة .. من متى أرمّسج ..
وانتي ولاهوب اويايه ..!!
شوه .. أخاف حب يديد يا غناتي وداسّة علينا .!!
ابتسمت طفلة .. بحزن .
ياااااااالله يا موزة وين الحين اللي يستاهل الحب
والحب من الأصل وينه ..؟
اقري عليه الفاتحة يا شيختي ..
على قولة خالد الفيصل ..
عقب القصور أمست بيوته خرايب .!!
عيل أنا حظي أحسن من حظج ..
جيف ..؟
أعيش أعذب قصة حب .. وكأني في عالم ثاني
ما تتصورين حاسة اني انولدت من يديد .
الله يهنيج ويسعدج فديتج
ما نتمنى لج غير الراحة لاخليت منج .
وصل صدى صوته لقلبها .. وسرحت من يديد
ناداها الماضي .. حين أوصل لها إحساسه
لأول مرة .
شيختي أنا معجب بج فوق ما تتخيلين .
وأنا أعتز طويل العمر .
هزت راسها بحزن
وتنهدت بألم دون ماتدري .
نبهها صوت موزة ..
أفا .. بيعينا في السوق ياطفلة
وش هالتنهيدة اللي احرقت يوفج
عسى ماشر ياقلبي
أقدر أساعدج في شي ..؟!!
لالا غناتي .. بس تذكرت موقف قديم
انتهى هو وأصحابه .. لا تشلين هم .
انزين أرويج شي يسعد قلبج وينسيج الهم ..؟
ياليت .. والله ياموزة محتاية أفقد الذاكرة
مش بس أنسى ..!!
هاه رويني وش عندج .
شوفي اقري هالمسج الغاوية من عند الغالي
توقف نبضها للحظة
وتحجرت نظرتها على شاشة الموبايل
حاولت تتكلم .. ما لقت صوتها
دقات قلبها ردت للخفقان بسرعة شديدة
لدرجة خافت لاتسمعها موزة
ترقرقت دمعة في عيونها
وابلعت عبرتها بعد جهد مع أنفاسها
موزة .. من وين يت هالمسج .؟
ترى فديتج قلت لج من عند الغالي
ياربي أسألها عن اسمه
لا
مااقدر وش باتقول عني
بس .. موب معقولة هذي المسج أنا صغت حروفها
وأنا نزفتها من قلبي
و أرسلتها له .!
كيف وصلت لحبيبها وأرسلها لها ..!!
لالا
أكيد مثل باقي المسجات تداولوها
لين وصلتها
ليش احرق قلبي وهو ابروحه موب ناقص .
مسحت بيديها على ويها
أشهد أن لا إله الا الله .
!
!
وسط ذهول موزة .
.
طلعت موزة بعد أن وعدتها بالزيارة
في مكتبها في المجمع الثقافي
للبحث في موضوع المعرض .
روضة تعالي شوي أباج .
هلا طفلة .. آمريني فديتج ..؟
مايامر عليج عدو لاخليت منج ..
بس بغيت أسماء الشعراء
المدعوين للأمسية عشان ننسق وصولهم للبلاد
ونرتب إقاماتهم مثل ما قلت لج ..
غنيمة فديتج بس فيه إسم اتصل الوكيل وأضافه
قبل شوي وما بغيت أدخل وضيفتج موجودة .
تفضلي مكتوب في الورقة ..
الا شو ظنج بيتغير شي مع التشكيل الوزاري اليديد ..؟
مدري والله .. بس نحن ماتفرق معانا
اللي بيي حياه الله واللي بيروح ربي يحفظه
ترى نحن في مكاتبنا وشغلنا هو ما يتغير
وربي يوفقهم للخير هذا أهم شي .
انزين فديتج أنا باخذ الأوراق معايه البيت
عشان أرتب برنامج الضيافة لهم براحتي
والوقت الحين خلص .. أشوفج باجر بحيل الله
كلمي الحارس يخلي الدريول يدخل السيارة لاهنتي .
ودعت سكرتيرتها و طلعت بدون ما تشوف أوراقها
اكتفت بلمهن في ملفها الجلدي .
السلام عليك محيي جيف حالك .. ؟
أوه دادا انتي هنيه ييتي معاه ..!
ليش ما خليتي وحده غيرج اتيي ؟
انتي مافيج للنزلة والطلعة با تعورج اريولج ..
حبيبة دادا .. كنتي النهاردة نازلة تعبانة
والظاهر انك كنتي نايمة معيطة .. ليه يا حبة عيني ؟
شغلتي بالي ..
وعشان كده حبيت أجي أخدك من المكتب
مع محيي بنفسي .
ربي لايحرمني منج يادادا ..
ما تتصورين كم أنا محتاجة
للراحة .. ادعي لي فديتج ..
وحطت راسها على كتف دادا اللي احضنتها هي بعد
بحزن وحنان .
عند الإشارة وقف بالقرب منهم باص لروضة أطفال .
يااااااالله يازينكن ياالصغيرونات ..
بعدكن قلوبكن خضرا
ما عرفتن هالدنيا وش قد شينة ..!
طالعي يادادا رئيسة ..
شوفي هالبنية مااحلا بياض ويها
وشرايط شعرها .. شوفي ابتسامتها مازينها .!
آاااااه يا من يردني مثلها وياخذ نص عمري ..!!
ياضنايه .. ماانتي كنتي زيها ياطفلة وكمان أجمل
عارفة .. كنت وأنا باسرّح لك شعرك للمدرسة
أقول في نفسي يارب تحرسها .. لأن كل الناس
من ساعة ما تنزلي بتقعد تبص عليكي ..
وعشان كده الشيخة الكبيرة و بابا ماكنوش بيرضوا
تركبي الباص .. ولازم تروحي بالسيارة من خوفهم عليكي .
ياليتهم يادادا خلوني أسير مع خوياتي في الباص
هذي تجربة كم حبيت أعيشها ..
لكن يالله هي هذي بس اللي راحت عليّه ..؟
ليه بتقولي كده يا عنيه .. ده كل البنات بيتمنوا يعيشوا
حياتك .. ويتمتعوا ولو بشوية من اللي عندك .!!
كفاية حب بابا وماما واخواتك ليكي ..
ده انتي نور عين اخواتك الشباب وما بياكلوش اللقمة
الا لو كنتي جنبهم .
الحمد لله يادادا نعمة من الله ..
لذلك أنا في كل تصرفاتي
أحاسب على طاريهم وذكرهم بين الناس ..
يعل يومي قبل يومهم .
أخس عليكي يا طفلة .. بعد الشر
ربنا يديكم كلكم طولة العمر .
دخلت البيت وخذت دادا عباتها وشيلتها
وأوراقها لغرفة نومها .
ماماتي .. فديتج يا حناني وش حالج
احضنيني قووووو تعبانة يا اميه محتاجة أرتاح .
بسم الله عليج .. اش بلاج فديتج .. عسى ماشر
حد مزعلنج .. أو مضيق خاطرج ..؟
والا متعبينج في الدوام ..!
كم قلت لج يا ابنيتيه قعدي وارتاحي ..
انتي موب محتاية للشغل .. ما سمعتي رمستيه .!
لا تحاتين .. بس شوية تعب فديت عينج ..
الشغل يا امايه يريحني ويشغل وقتي
وغير جذيه خلينا ياالغناة انحاول انرد ولو شي
من دين وفضل وحق البلاد علينا .
حبت عيون امها بحنان وشوق
وحضنتها بدلعها المعتاد .
فدييييت ريحتج ماماتي .. كم تولهت عليها
مع اني ماخذة جرعة حنان وأنا نازلة الصبح
بس .. تعرفيني طماعة ما أشبع .
وين ابويه واخواني ..؟
وين فديتج .. كالعادة في الميلس وعندهم رياييل
وابوج اليوم بعد ذابح عنده ضيوف من دبي .
فديت روحه يا اميه .. هو بس اليوم ذابح
ترى هذه حالته كل يوم غدا وعشا ..
وان ماذبح هو .. اخوان طفلة ما يقصرون
عسى ربي ما يخلينا منهم يا امايه
كم يسوى يوم أشوف هالعدد من السيارات
جدام البيت .. والله كأنا بيوم العيد .
ونحن فعلا بوجودهم وطولة عمارهم
كل يوم في عيد .
اسمحي لي شيخة الحبايب باسير أصلي
وأرتاح شوي .. ويوم بيجهز غدانا ازقروني .
حبت أمها بين عيونها ودخلت غرفتها .
فيصل العمري
28-03-2006, 08:01 AM
متابع للنهايه
.
بعد ما صلت العصر مشطت شعرها
ولبست ثوب مغربي .. فستقي اللون
و تركت شعرها مفتوح على طبيعته
من غير ماتلفّه .
مساالخير ماماتي
عطيني حناني شوي .. الوي عليّه .
لاخلاني ربي من هالريحة الزينة .
الله يعافي مساج يا غناة امج
وش امسيتي عيوني ..؟
أمسينا و أمسى الملك لله
وأمسيت غنية بشوفج وسلامتج يا شيخة الحبايب .
امايه .. اخوانيه ما يو من البر ..؟
لا والله وهم اسلوم .. بعدهم بس قالوا بيضوون اليوم
كانوا حاضرين المزاينة البارحة قرب عزبتهم
في النعيرية ..
ربي يفك لهم من شر الطريج .. والله يا بنتيه من يسيرون
وأنا في قلبي الضو منهم .. الطريج بعيد وهم مخلين
حلالهم هناك .. وكل اسبوع يسيرون ويشلون قلبي اوياهم
فديت الحنان والعنصرية ياربي
ليش ماماتي أنا ما أسد .. ؟!!
فديتج انتي نظر عيني .. لكن تعرفين قلبي ينشغل
على هذولاك اللي قابضين درب طويل ..!!
يالله اني رادة بهم الشان عندك تحفظهم .
تفاجأن بباب الميلس ينفتح ويدخلون الشباب
حمدان و نهيان .
وااااااايه مرحبا الساع مليار
فددددديت شوفكم ودخلتكم عليه .
حمدت ربي وشكرته على سلامتكم .
حبوا امهم على راسها وكفوفها
وقامت طفلة واحضنتهم
بحنانها المتعودين عليه .
وش حالكم فديت شوفكم ..؟
تولهت عليكم .. وعلى ريحتكم .
حمدان : يالله يا اطفيلة من زين ريحتنا عاد
لاتلوين عليه ولا تدقيني الحين
خليني لين أتسبح من ريحة البر والبوش .!
والله لا ألوي عليك واحبك غصب عنك
أصلا أنا موتي وحياتي ريحتكم
خصوصا لي عادكم يايين من العزبة
يوم اتعقون شالاتكم والله اني اسير أتروّحها
وأشم باقي ريحة الضو فيها .
الوالدة : وش أخبار سيرتكم .. ؟
وحلالكم شااخباره ..؟
نهيان : ايسرج حاله يا الغناة
كل شي زين .. والبوش بخير ولا عليهن قاصر
لا واشترينا البارحة عزبة كاملة
بغرفها و خيامها وحتى تنكر الما معاها
ترى يبنا لج لبن حالبين قبل لانمشي
وعطيته دادا رئيسة اتحطه في الثلاجة .
الوالدة : مبروكة عليكم يا غناتي
ربي يعطيكم خيرها ويكفيكم شرها
لكن عزبتكم عودة ما تبا زيادة ..؟
حمدان : هيه اميه بس لي يونا ضيفان
نحتاي غرف زيادة .. وتدرين البدوان اللي حولنا
من نوصل يتجمعون عندنا .. يعني نحتاي
للعزبة و تراها بتنفعنا في الإجازة لي ييتوا صوبنا .
تدرون والله لين الحين مانسيت إجازة الربيع
يوم قضينا الإجازة عندكم في النعيرية
ياربيه مازين صوت المطر في الليل على الخيمة
تقول همس خلان .. و قصايد عشاق
الله على ذاك الوقت مااحلاه ..!!
نهيان : اطفيلة تدرين ابا حرمة مثلج
خصوصا طيبة قلبها وحنانها
وشرط يكون شعرها طويل مثلج
عشان ألعب فيه مثل ما ألعوزج
يوم احط شعرج على راسي وجتفي .!!
الوالدة : وين باتحصلون مثل اطفيلة ..؟
والله لي بتبطون مالقيتم لها مثيل ولا شبيه .
يالله يااميه بيلقون احلا وأجمل بعد .
حمدان : صدقها اميه يخسن عنج البنات
وانا خو طفلة مثلج ماحد .
عساني ما أذوق حزنكم
ولا يحرمني ربي من حنانكم
تدرون والله انكم كرهتوني في الرياييل
وين باحصل مثل حنانكم وطيبكم ..؟!!
حمدان : هاتي شعرج بالعوزج شوي
من زمان ما لعبت فيه وبهدلتج .
ياخذ شعرها ويلفه من ورا ارقبته ..
ويحضنها وهو يضحك .
يهمس في إذنها
طفلة وش فيج ..؟
تراج موب عايبتني من فترة .. والحين لو تضحكين
أشوف الحزن بعيونج
وهالدمعة اللي دوم قريبة ..!! وش سالفتها ؟
ترى وانا اخوج ما تقرب دمعة الا اللي منكسر
خاطره ومنيرح قلبه ..!
وش فيج من مضايقنج ..؟
خبريني فديت عيونج .. اللي أشوف الدمعة
حايرة فيهن .
لوت عليه .. وانفجرت بالصياح .
خذها وهو يأشر لأمه ونهيان .. لا تتكلمون
وسار اوياها لغرفتها .
.
.
* الوي عليه / احضنيني
* لوت عليه / احضنته
* ألعوزج / أغربلج و أمشكلج
* البوش / النوق
* أتروّح / أشم
ظافر الأحمري
14-04-2006, 03:41 AM
سلمتي وسلم نبضك على هالنص الراقي
سجلي اعجابي ومتابعتي ولك تحياتي
محمد الفرحان
23-04-2006, 12:08 PM
.
.
روح المنابع
.
.
تشرفت بمعانقة ابداعك وقراءة
هذه القصه الرائعه . .
.
.
فائق تقديري واحترامي
فهد الدباسي
23-09-2006, 09:58 PM
رائعة رائعة أختي
قرأتها قبل هذه المرة و وج\دتها مؤثرة و مليئةً بـ الروعة
سلمتي و دمتي
تحياتي
مزون المحمد
10-03-2007, 01:24 AM
شيمة
ألف شكر لروعة حضورك
دمتِ بألف خير
vBulletin® v3.8.7, Copyright ©2000-2012, TranZ by Almuhajir