حـفـنــة أبيــــات

[محمد الذرعي]

.


يا كيف طاحت صورتك من عيوني = وأنت الذي وسط العيون امتمركي
الياس وقّف دون قلبـك ودونـي = من يوم غرّوك العـواذل بتَركـي
وقاطعتني يوم المـلا قاطعونـي = وغديت كنّي (مُنتـجٍ دانمركـي)!

.

[محمد الذرعي]

.


خبّروا من صوّب الرمح العوَج = (الوفي) من طعنة الغادر نجا
يوم جوْ له بالهجوم المزدوَج = (الرّدي) و(الحاقد) بليل الدجا
الله أكرم عبده بوقت الحـوَج = وما يخيب اللي لفضل الله رجا

.

[محمد الذرعي]

.


الفرق واضح بيـن همّـي وهمّـك = شتّان ما بيـن السخـي والبخيلـة
أكبر همومي .. كيف أزاحم غلا أمّك = وأكبر همومك .. صبغتك للجديلـه!
.

[محمد الذرعي]

.


صحت .. لين الصوت بالظلما تبدّد = يا حبيب الروح لا تنوي بعـادي
ثم رجع صوتي على سمعي وردّد = يا منادي .. لاحياة لمـن تنـادي

.

[محمد الذرعي]

.


قلبي يفيض بغلاه إن مال لأحبابه = مثل (المرَشْ) لا تمايل ينتثر طيبه

.

[محمد الذرعي]

.


الله وأكبـر! كـل هـذي عيـوبـي؟ = ما كنّك اللي قلت : ما شفت بك عيب!
العام مُعجب جابـك الحـب صوبـي = واليوم صارت كل صفاتـي عذاريـب

.

[محمد الذرعي]

.


ما تصالحنا .. ولا طـاح الحطـب = لا ولا طبنا مـن الجـرح العطيـب
وأنت طبعك موسمي مثـل الرطـب = بس ثلاث أشهر .. وتسعه ما يطيب
كل حرف إعجـاب قلنـاه انشطـب = من عقب جفّيت يا الغصن الرطيـب

.

[محمد الذرعي]

.


300 إسـم فـي لستـه أرقامـي = ربع وقرايب وجيران و بني عمّـي
ما فيهم اللي يضمّد جرحي الدامي = ولا فيهم اللي يحس بزلزلة همّـي
إلاّ هواي .. ومُناي ومصدر إلهامي = عسى الوصل دايمٍ من يمّه ويمّـي

.

[محمد الذرعي]

.


على كيفك .. وسوّ اللي طرا لك = ولكـن لا يقاطعنـي وصالـك
أنا يا سيّـدي بيـن الأيـادي = يمينك تامر .. وتنهى شمالـك
لقيت بنظـرة عيونـك مـودّه = تلـوم القلـب لا دوّر بـدالـك
ولقيت بديرة أطباعك مطامـع = تحرّضني على حرب احتلالـك
أحبك .. ثم أحبك .. ثم أحبـك = ألا يا كثر ما قـد قلتهـا لـك

.

[محمد الذرعي]

.


رجعت لي عقب الجفا رغم أنفـك = والشوق جابك غصب عنْك لحبيبك
أمسيت .. بعنادك وصدّك وعنفـك = وأصبحت .. برضاك وحنانك وطيبك
ما قلت لك ! عقدة مجافـاك تنفـك = واللي خذاك اليوم .. باكر يجيبـك

.

[محمد الذرعي]

.


يا صاحبي لا تشكي الهـم واليـاس = لا دار دولاب المقـاديـر عكـسـي
إصبر على ما صابك وقول : لا باس = ما دمت متعافي .. وماكل .. ومكسي
ترى الرضا فيما كتب خالق النـاس = أحلى من السكر وطعم (الجلكسـي)!

.

[محمد الذرعي]

.


ما كتبت أغلى القصايد من فراغ = وأنت وصفك كوكبٍ صعب البلوغ
الشعر في غير حسنك ما يصاغ = وإن كتبته في هوى غيرك يروغ

.

[محمد الذرعي]

.


أنا قلبـي مـن الفرقـا تلـوّع = جريح .. ومن نظر جرحي تروّع
حديث الطب كلّـه مـا نفعنـي = ولا الكيّـه ولا رقيـا المطـوّع

.

[محمد الذرعي]

.



نفس السؤال اللي يراودني العام = لازال في فكري ولا احدٍ يجيبـه
ليه انتهت حلو الليالي والأيام؟ = وأقفى ولا برّر دواعي مغيبـه؟

.